«Ժառանգության» համագումարին նախկին քաղբանտարկյալ Կարապետ Ռուբինյանը խոսելով այդ կուսակցության վերջին տարիների գործունեության մասին՝ նկատեց, որ այն ոչ միայն խորհրդարանական ակտիվ գործունեություն է ծավալել, այլ եղել է նաև քաղաքացիական շարժումների կողքին:
Նա շնորհակալություն հայտնեց «Ժառանգությանը»՝ որպես մի մարդ և նախկին քաղբանտարկյալ, որը եղել է 2008 թվականի մարտի 1-ի գնդակահարված ժողովրդի շարքերում։ Կ. Ռուբինյանը հույս հայտնեց, որ այժմ «Ժառանգություն»-ը նորընտիր ԱԺ-ում ավելի ծանրակշիռ ներկայացվածություն կունենա:
Ողջունելով «Ժառանգության» և «Ազատ դեմոկրատներ»-ի միջև առկա համագործակցությունը՝ Ռուբինյանն ասաց. «Հույս ունեմ, որ այս երկու ուժերը ընդհանուր լեզու կգտնեն, ազատական դաշինք կստեղծվի, և իրենց համախոհներին չեն կանգնեցնի ծանր երկընտրանքի առջև»:
«Ազգային համաձայնություն» կուսակցության ղեկավար Արամ Հարությունյանը իր խոսքում ևս ողջունեց «Ժառանգության» և «Ազատ դեմոկրատներ»-ի միջև առկա բանակցությունները և հույս հայտնեց, որ այդ դաշինքը կկայանա, քանզի այդ երկու ուժերում էլ համախմբված են մարդիկ, որոնք իրապես իրենց մեջ կրում են ազատականության գաղափարը և իրոք մտահոգված են Հայաստանի ապագայով: «Հույս ունեմ, որ այս համագումարը լուրջ պտուղ կտա»:
Ի դեպ, Արամ Հարությունյանը ողջունեց նաև դահլիճում ներկա ՄԱԿ կուսակցության ղեկավար Գուրգեն Արսենյանի՝ ԲՀԿ-ի հետ դաշինքով հանդես գալու քայլը: