Հարցազրույց ԱԺ նախկին փոխխոսնակ, ՀԱԿ նախկին անդամ Կարապետ Ռուբինյանի հետ
– Ի՞նչ եք կարծում, ինչո՞ւ իշխանությունը թույլ տվեց, որպեսզի օլիգարխիկ շերտը ներկայացված լինի խորհրդարանում:
– Որովհետեւ Սերժ Սարգսյանը մինչեւ հիմա հենվում է նրանց վրա: Այլապես, եթե օլիգարխները նրան ձեռք չտային, ինչու պետք է պահեր:
– Իսկ գուցե նրանց առաջարկվեր նստել կազինոյո՞ւմ: Անպայմա՞ն էր, որ խորհրդարանում ներկայացված լինեն:
– Օլիգարխները նաեւ սեփական ամբիցիաներն ու շահերն ունեն: Իրենց համար ապահովություն են փնտրում, իրենց ապօրինի գործունեության պաշտպանություն: Կա շահերի համընկնում, շահերի բախում, շահերի ներդաշնակեցում:
– Ըստ Ձեզ, ինչո՞ւ են հանրապետականները մեղադրանքներ ուղղում քաղաքացիական շարժմանը: Դուք ինչպե՞ս կմեկնաբանեք Արտաշես Գեղամյանի` նախօրեին արված հայտարարությունը «Հարսնաքարի» դեպքերի, Ռուբեն Հայրապետյանի մասին:
– Ինչո՞ւ պիտի ես մեկնաբանեմ Գեղամյանի ասածը: Ի սկզբանե, նա ստորություն է ասել: Իր խոսքում, խոսելով քաղաքացիություն չունեցող ակտիվիստների մասին, նա ակնարկել է Ժիրայր Սեֆիլյանին, ով տասնապատիկ անգամ ավելի արժանավոր քաղաքացի է այս երկրի համար, քան ինքը` Գեղամյանը: Ես նույնիսկ կասկածում եմ` Գեղամյանն այս երկրի՞ քաղաքացի է, թե՞ ԽՍՀՄ-ի:
– Ի՞նչ եք կարծում, ՀՀԿ–ն եթե անգամ փորձում է պաշտպանել իրենց կուսակից ընկերոջը, որքանով են ստացված դրա փորձերը:
– Իսկ ինչո՞ւ պիտի ստացվի: Իրականում ինչ փաստարկներ ունեն, որ հզոր պաշտպանություն ապահովեն: Միեւնույն է, ամբողջ հասարակության համար պարզ է, որ այս իշխանական համակարգը քրեածին է, քրեական է եւ անհանդուրժելի: Նրանք այս համակարգի մասնիկներ են: Բնականաբար, պաշտպանության ինչ-որ խղճուկ փորձեր են անում: Բայց ո՞վ է նրանց խղճուկ փորձերը բանի տեղ դնողը:
– Իսկ Ձեզ համար տեսանելի՞ է ՀԱԿ–ԲՀԿ–ՀՅԴ համագործակցության ֆորմատը մեկ անձի պաշտպանության շուրջ: Ինչպե՞ս եք գնահատում այս տրիոյի քաղաքական շանսերը:
– Ոչ: Տեսանելի չէ եւ շատ զարմանալի կլինի այդ ձեւաչափը: Դա նշանակում է, որ ընդգրված կողմերից առնվազն մեկը շատ մեծ կոմպրոմիսների է գնում եւ չեմ կարծում, թե դրա արդյունքում առաջացած թեկնածուն կվայելի ժողովրդի վստահությունը: Բայց, իհարկե, իսպառ չեմ բացառում նման զարգացումը` քաղաքական ներկայիս անբարոյական մթնոլորտում ոչինչ չի կարելի բացառել:
– Դուք առաջիններից էիք, որ դուրս եկաք ՀԱԿ–ից եւ Ձեզ հետեւեցին բավականին հեղինակավոր անձիք: Ըստ էության, ստացվում է, որ ՀԱԿ–ի կազմաքանդողը Դո՞ւք էիք:
– ՀԱԿ-ի կազմաքանդողը հայտնի է` հենց ՀԱԿ-ի ղեկավարն է: Պատճառն այն է, որ նա որդեգրել է մի քաղաքականություն, որը, ըստ էության, անհասկանալի եւ անընդունելի է ընդդիմադիր պայքարի մասնակիցներից շատերի համար: Ցավոք, իմ դուրս գալուց հետո էլ են սխալներ գործվել եւ էական սխալներ: Եթե ես լինեի կազմաքանդողը, ապա իմ հետեւից Կոնգրեսը միանգամից կփլուզվեր: Բնականաբար, այդպես չէ:
– Լեւոն Տեր–Պետրոսյանը բավականին լուրջ գործիչ է, եւ չենք կարող մտածել, թե նա ադեկվատության հետ կապված խնդիրներ ունի: Իրականում ո՞րն է ԲՀԿ–ի հետ համագործակցելու շահը` մի ամբողջ 5 տարի ընդդիմադիր շարժում ծավալել, հետո տանել Ռոբերտ Քոչարյանի գի՞րկը:
– Ես չեմ կարծում, Ռոբերտ Քոչարյանի գիրկը տանելու համար է արվել: Մինչեւ 2008-ի մարտի 1-ը եւ հետո որոշակի կարճ ժամանակ եղել է իրական պայքար քրեաօլիգարխիկ ռեժիմի դեմ: Ուղղակի մարդը, հետագայում հրաժարվելով իրական պայքարից, սխալ ուղի է ընտրել, բայց, գոնե արտաքուստ, համոզված է իր ճշմարտացիության մեջ: Բայց տենում ենք, որ չի կարողանում համոզել իր ճշմարտացիության մեջ շարժմանը ոչ թե անձնական այլ գաղափարական դրդապատճառներով միացածներից շատերին: Կա, իհարկե, մի նեղ ու աղմկոտ շրջապատ, որը անվերապահորեն անձին է նվիրված: Այսքանը:
Հարցազրույցը` Մարինա Բաղդագյուլյանի